O Chanfaina Lab leva o audiovisual ás parroquias cun ciclo itinerante

O Chanfaina Lab quenta motores para a súa undécima edición cunha programación especial que, durante as próximas semanas, levará o cinema ás distintas parroquias de San Sadurniño. O Chanfaina Itinerante, un ciclo impulsado en colaboración coas asociacións de veciños e veciñas de cada parroquia, permitirá recuperar e compartir unha selección de pezas audiovisuais vinculadas directamente con cada territorio.

A proposta desenvolverase entre finais de xullo e o mes de agosto nos locais sociais das parroquias, que se converterán durante unhas horas en espazos para o encontro, a cultura e a memoria colectiva. A entrada será libre e todas as sesións comezarán ás 20:30 horas, cunha duración aproximada de hora e media.

A principal singularidade desta programación é precisamente a súa estreita relación con cada parroquia. En cada pase proxectaranse pezas gravadas nese territorio ou que teñen como protagonistas, de maneira directa ou indirecta, as persoas que viven nel. Así, o ciclo ofrece unha oportunidade para volver mirar lugares coñecidos a través da cámara e, ao mesmo tempo, recoñecer nas historias e nas imaxes a persoas, paisaxes e vivencias que forman parte da identidade de cada parroquia.

A selección das obras busca tamén recuperar pezas destacadas de diferentes edicións do Chanfaina Lab e achegalas de novo ao público, pero facéndoo desde unha perspectiva próxima e local. O resultado será un percorrido audiovisual polas parroquias de San Sadurniño a través das historias que se foron construíndo ao longo dos anos no marco deste encontro de cineastas.

A organización do ciclo conta coa participación activa das asociacións veciñais, fundamentais para facer posible que as proxeccións cheguen a cada parroquia e que os locais sociais sexan, unha vez máis, lugares de reunión e participación.

O calendario de proxeccións é o seguinte:

• 2 de agosto - Local social de Santa Mariña
• 7 de agosto - Local social de Lamas
• 8 de agosto - Local social de Igrexafeita
• 9 de agosto - Local social de Ferreira
• 21 de agosto - Local social de Naraío
• Por determinar - Local social de Bardaos

O ciclo itinerante será o aperitivo dunha nova edición do Chanfaina Lab

Este ciclo servirá como antesala da undécima edición do Chanfaina Lab, que se celebrará os días 4, 5 e 6 de setembro. Durante esa fin de semana, San Sadurniño volverá converterse nun punto de encontro para creadoras e creadores audiovisuais con diferentes traxectorias e procedencias, unidos pola vontade de experimentar, contar historias e explorar novas formas de narrar o territorio a través das imaxes.

Co ciclo itinerante, o Chanfaina Lab amplía así o seu espazo de acción e devolve ás parroquias parte das historias que ao longo destes anos se crearon nelas, nunha programación que reivindica o audiovisual como ferramenta para coñecer, compartir e poñer en valor o territorio e as persoas que o habitan.