Durante a fin de semana do 5 ao 7 de setembro do 2025 revivimos a marabillosa experiencia emocional da Chanfaina Lab: un encontro de cineastas que pon en valor o territorio do concello a través dos ollos de creadores e creadoras audiovisuais de Galicia.

A idea é sinxela: as persoas participantes teñen que gravar na fin de semana unha película cunha duración de entre tres e cinco minutos, con absoluta liberdade sobre o tema e tratamento visual.

A ollada contemporánea sobre a paisaxe rural e as súas xentes, a emigración, a memoria histórica, o devalar do tempo, as diferenzas paisaxísticas e sociolóxicas entre as sete parroquias que compoñen o concello, transforman a San Sadurniño nun universo por descubrir e moi axeitado para debullar propostas visuais innovadoras.

O nome de chanfaina alude a unha receita tradicional dos territorios de antigos señoríos, cando as partes "nobres " do animal entregábanselle aos Señores, mentres as vísceras e as partes máis pobres quedábanse na cociña das labregas, coas que preparaban a denominada chanfaina, de grande tradición nas parroquias de Bardaos e Igrexafeita.

Outro dos sinais de identidade da Chanfainalab é o de ser un "revolto de cousas diversas"; por iso procura a diversidade dos/as cineastas segundo idade, xénero, formación ou experiencia para que o encontro sexa un tempo fecundo, unha celebración da tolerancia, onde se intercambien ideas, experiencias e capacidades.

Entre os creadores e creadoras que participan coa súa cámara, máis do 60 % son naturais ou veciñas de San Sadurniño: os mozos e mozas Anxo Pena, Iago Lourido, Bieito Beceiro, Pablo Martínez, Ángela Arnosa, Kevin Lorenzo e os colectivos “NaraíoMedia”, os veteranos veciños e veciñas de "A Rigueira" e “Teño unha horta”.

Completa a listaxe "local" un grupo de cineastas, que achegan a súa xenerosidade e talento a esta experiencia singular como Fran da Lobeira, Leandro Lamas, Roberto Grandal, Abel Vega e “The Sungirls” entre outros.

Entre as persoas cineastas foráneas, nesta edición participan novas promesas do audiovisual galego da Facultade de Belas Artes como Rocío Campoy e Gala Rodríguez. Profesionais de longa traxectoria como Carlos Amil, Milagros Bará, Quique Otero e Pablo Fontenla.

Cineastas de estilos narrativos propios como Area Erina, Brandán Cerviño, Irene Pin, Álvaro Núñez ou Gon Caride.

Todos eles e elas representan diferentes modos e xeitos de concibir a creación audiovisual dende ámbitos e prácticas artísticas diversas, engadindo matices e unha gran pluralidade ano tras ano ás 240 pezas producidas na nosa historia.