Chanfaina Itinerante: Lamas

Lamas toma a remuda do Chanfaina Itinerante cunha tarde-noite de cinema e petiscos

O Chanfaina Itinerante fará a súa seguinte parada en Lamas o venres 7 de agosto, cunha nova sesión de cinema organizada en colaboración coa Asociación Veciñal "Xuntanza de Lamas". A cita será ás 20:30 horas no local social.

Ao longo da sesión proxectaranse unha selección de curtas realizadas en distintas edicións do Chanfaina Lab, todas elas gravadas en Lamas ou estreitamente vinculadas coa parroquia e coa súa veciñanza. En total, serán arredor de 60 minutos de proxección, cun percorrido por historias, espazos e persoas que forman parte da memoria audiovisual do territorio.

A xornada completarase cun petisco para as persoas asistentes, por cortesía da Asociación Veciñal "Xuntanza de Lamas", ofrecendo un momento para compartir impresións e conversar arredor das pezas proxectadas nun ambiente distendido.

O Chanfaina Itinerante é un ciclo de proxeccións organizado xunto ás asociacións veciñais das parroquias de San Sadurniño. Ao longo do verán, a iniciativa percorre distintos puntos do municipio para devolver ás comunidades as historias filmadas nos seus propios lugares, convertendo os locais sociais en espazos de encontro arredor do audiovisual e da memoria compartida.