Ana Lamas, é unha veciña de Igrexafeita que dende moi cativa tivo a teima de facer cousas coas mans. Sempre di "o que non vale para nada é o que me gusta". Co devalar do tempo foi desenvolvendo outras afeccións como a fotografía, a escrita, pero sobre todo argallar iniciativas e proxectos para mellorar a vida da comunidade. Está considerada como unha das máis relevantes expertas e cociñeiras da chanfaina. Despois de traballar uns anos de forma profesional cultivando a horta, quedouse con ela para autoabastecemento, e comezou unha andaina na artesanía hai xa catro anos co proxecto das Lolas da cascarilla, traballando coa materia prima das follas de millo. A súa iniciativa xa foi louvada varias veces en diferentes medios de comunicación. De feito, unha das súas creacións, - a Lola chanfaineira- é a imaxe e galardón que se lle outorga aos cineastas participantes na Chanfainalab. Este ano animouse e participou por vez primeira na Chafainalab como cineasta.