Durante a fin de semana do 1 ao 3 de setembro do 2017 celébrase en San Sadurniño a 4ª edición do  Chanfaina Lab, unha experiencia de creación audiovisual colectiva que tenta poñer en valor o territorio do Concello a través dos ollos de creadores/as audiovisuais galegos/as. A idea é sinxela: os participantes teñen que gravar durante un fin de semana unha película dunha duración de entre tres e cinco minutos, con absoluta liberdade sobre o tema e tratamento visual. A ollada contemporánea sobre a paisaxe rural, a emigración, o devalar do tempo, as diferenzas paisaxísticas e sociolóxicas entre as sete parroquias que compoñen o concello, transforman a San Sadurniño nun universo por descubrir e moi axeitado para debullar propostas innovadoras de calquera artista visual.
Outro das sinais de identidade da Chanfaina é o de ser un" revolto de cousas diversas"; por iso procura a diversidade dos/as participantes segundo idade, sexo, formación ou experiencia d@s cineastas para que o encontro oferte un tempo fecundo, onde se intercambien ideas, experiencias e capacidades. Entre os creadores/as que participan coa súa cámara nesta edición figuran autores/as naturais ou veciños de San Sadurniño como, os axitadores socioculturais de Silvalonga Asociación ConcienciArte, o veterano de Igrexafeita Abel Vega, o "adoptado" na Lobeira Fran da Lobeira, os mozos de Bardaos Bieito Beceiro ou Sebastián Rodríguez de Lamas, o neno de Sansa Pablo Martínez; as xa famosas labregas de "Teño unha horta en San Sadurniño": Consuelo Picos, Cruz Piñón, Lucía Pita, Carmen Couce e Carmen Bouza e as mozas de The Sungirls; tamén veñen cineastas ferroláns como Lara e Noa Castro. E por suposto participan relevantes cineastas do cinema galego procedentes de distintos puntos da xeografía do país: o monfortino Alberte Lobelle, a política e gran afeccionada ao cinema Ana Pontón, o investigador e programador Ángel Rueda, a cineasta pontevedresa Anfos Fazáns, a cineasta de Mazaricos Carmen Rey, a profesora e documentalista Cristina de la Torre, a directora da Costa da Morte Olaia Sendón, o noso cineasta mais internacional Oliver Laxe. Neste ano contamos ademais coa presenza de Portugal da man do cineasta, programador e dinamizador Carlos Viana, quen ademais de crear a súa peza amosaranos unha antoloxía de curtas do cinema rural portugués..

Ademais do Encontro de Cineastas e as proxeccións de venres e o sábado, desenvólvesen tres obradoiros con entrada libre e gratuita
Venres 1: María Yáñez: "Folclore dixital: o uso cultural dos memes, os microvídeos e os gifs animados" e Juan Lesta: “Monta-móbil”
Domingo 3: Oliver Laxe “Cine rural. O cinema da soberana sumisión”
O evento está organizado polo Concello de San Sadurniño. Colaboran as Asociacións veciñais de Santa Mariña do Monte, Adiante Igrexafeita, Xuntanza de Lamas , San Pipote de Bardaos, Pico de Ferreira e Aula Cemit. O encontro está patrocinado pola Deputación de A Coruña e o Concello de San Sadurniño.
Este será o programa oficial da IV Chanfainalab:
Día 1, venres
10.00. Obradoiro “Folclore dixital: o uso cultural dos memes, os microvídeos e os gifs animados” na Casa da Xuventude-Aula CeMIT, 15 prazas. Impartido por María Yáñez.
16.00. Chegada de cineastas
16.30. Obradoiro “Monta-móbil” na Casa da Xuventude, 15 prazas. Impartido por Juan Lesta
18.00. Recepción e visita guiada por San Sadurniño
20.00. “Eira de cineastas”. Selección de pezas realizadas pol@s cineastas participantes.
22.00. Cea de benvida
Día 2, sábado
10.00. Encontro e gravacións cineastas
14.30. Xantar da Chanfaina coa AAVV de Bardaos
20.00. “Cinema rural Portugués”. Selección de curtametraxes presentado por Carlos Viana
Día 3, domingo
10.00. Encontro e gravacións cineastas
14.30.. Xantar coa AAVV de Lamas
17.00: Masterclas “Cine rural. O cinema da soberana sumisión”. Casa de Cultura. Impartido por Oliver Laxe

Meses despois, o 3 de febreiro celébrase a estrea mundial das pezas producidas na Chanfainalab. Este é o programa oficial do evento con entrada libre e gratuita.