Un dos sinais da nosa identidade visual é reflectir na imaxe gráfica aspectos singulares do patrimonio material ou inmaterial de San Sadurniño no devir do tempo. O cartel desta edición inspírase nunha imaxe de Pumariño, unha publicación que foi moito máis ca unha revista na década de 1970: a voz crítica, participativa e retranqueira dun San Sadurniño que espertaba á democracia. Nesta ocasión, o cartel inspírase na descrición gráfica do Concello coma a roda dun carro e os seus radios coas sete parroquias: Bardaos, Monte, Lamas, Naraío, Ferreira, Igrexafeita e San Sadurniño.

A revista Pumariño, nacida en marzo de 1976, foi unha publicación fundamental para recoller a vida social, cultural e política de San Sadurniño durante os anos da transición á democracia. Ao longo dos seus 50 números, deu voz ás sete parroquias do concello desde unha mirada informativa, crítica e participativa, converténdose nun documento imprescindíbel para comprender aquel tempo de cambios, ilusións e novas formas de implicación cidadá.

Detrás daquela iniciativa estaba Ramón Díaz Raña, xunto cun grupo de persoas comprometidas coa necesidade de abrir espazos de información e debate nun momento no que a sociedade comezaba a mudar con rapidez. A revista naceu cunha vontade clara: achegar á veciñanza información útil, plural e próxima, afastada do partidismo, pero atenta á realidade social e política do momento.

O propio Ramón Díaz Raña lembraba que a principal preocupación era informar e favorecer a participación da xente, especialmente dunha cidadanía que viña de décadas de silencio, marxinación ou adoutrinamento. Esa intención converteu Pumariño nunha ferramenta de comunicación local moi avanzada para o seu tempo, cunha mirada posta no común e no papel activo da veciñanza.

A publicación tamén destacou polo seu espírito crítico, retranqueiro e libre, unha actitude que non sempre foi ben recibida por determinados sectores, especialmente polos poderes locais da época. Esa ollada incómoda, pero necesaria, forma parte hoxe do valor histórico da revista e axuda a entender mellor as tensións e esperanzas daqueles anos.

Ao longo da súa traxectoria, Pumariño contou coa colaboración de numerosas persoas con inquedanzas culturais, sociais e políticas, entre elas Marián Arroyo, Rexina Cinza, Miguel Sanjurjo Sixto, Pepe Gudín, María Teresa Pouso, Luís Fernández Prieto, Manuel Sixto, Manolo Rico ou Manuel José Lamas Soto, entre moitas outras voces que contribuíron a facer da revista un proxecto coral.

Na actualidade, a colección completa pode consultarse grazas á edición dixital realizada pola Asociación Cultural O Castelo de Naraío no ano 2014, un traballo que permite recuperar e poñer en valor unha publicación imprescindíbel para coñecer a memoria recente de San Sadurniño.

Podes consultar toda a información e a historia do Pumariño e descargar todos os números publicados na web Fálame de San Sadurniño aquí: "Nace o Pumariño"