Chanfaina Itinerante: Santa Mariña do Monte

Santa Mariña será a primeira parada do Chanfaina Itinerante

A primeira parada do Chanfaina Itinerante será en Santa Mariña, onde a veciñanza poderá gozar dunha tarde de contos, merenda e cinema. A actividade, organizada en colaboración coa asociación veciñal, terá lugar o domingo 2 de agosto no local social.

A xornada comezará ás 19:00 horas cunha sesión de contos e unha merenda comunitaria e gratuíta. Xa ás 20:30 horas chegará a quenda do audiovisual, cunha selección de 11 curtas realizadas ao longo de distintas edicións do Chanfaina Lab e relacionadas con Santa Mariña, que sumarán aproximadamente 90 minutos de proxección.

Será unha oportunidade para volver descubrir, a través da mirada das cámaras, historias, lugares e persoas vinculadas á parroquia, recuperando pezas que forman parte do arquivo audiovisual construído ao longo dos anos polo encontro de cineastas.

A asociación veciñal anima a toda a veciñanza a participar nesta tarde de encontro e, para facilitar a organización da merenda, recomenda anotarse previamente contactando con calquera membro da directiva.

Con este encontro dará comezo o Chanfaina Itinerante, un ciclo de proxeccións organizado xunto ás asociacións veciñais das parroquias. Ao longo das próximas semanas, a iniciativa percorrerá diferentes puntos do municipio para recuperar pezas gravadas nos propios lugares ou protagonizadas pola súa xente.