Chanfaina Itinerante: Igrexafeita

Igrexafeita recibe o Chanfaina Itinerante cunha sesión de cinema arredor das súas historias

O Chanfaina Itinerante chegará a Igrexafeita o sábado 8 de agosto cunha nova sesión de cinema organizada en colaboración coa Asociación de Veciños "Adiante". A cita será ás 20:30 horas no local social.

A programación reunirá unha selección de curtas realizadas no marco do Chanfaina Lab, pezas que teñen Igrexafeita como escenario ou que gardan relación cos seus espazos, as súas historias e as persoas que forman parte da súa vida cotiá. Durante aproximadamente 60 minutos, as persoas asistentes poderán achegarse a diferentes maneiras de contar e observar a parroquia a través das olladas das e dos cineastas participantes no proxecto.

Máis alá da propia proxección, a sesión busca recuperar o audiovisual como ferramenta para poñer en valor a memoria local e favorecer o encontro entre a veciñanza arredor das historias que nacen no propio territorio.

Ao remate da sesión haberá un petisco para as persoas asistentes por cortesía da Asociación de Veciños "Adiante", un momento pensado para continuar a conversa, compartir impresións sobre as pezas proxectadas e crear un espazo de encontro nun ambiente próximo e distendido.

O Chanfaina Itinerante é un ciclo de proxeccións organizado xunto ás asociacións veciñais das parroquias de San Sadurniño. Ao longo do verán, a iniciativa percorre diferentes lugares do municipio levando de volta as historias filmadas no territorio e transformando os locais sociais en espazos de reunión arredor do audiovisual e da memoria colectiva.