Chanfaina Itinerante: Naraío

Naraío recibe o Chanfaina Itinerante cunha sesión de cinema arredor das súas xentes e historias

O Chanfaina Itinerante fará unha nova parada en Naraío  o venres 21 de agosto cunha nova sesión para compartir o cinema. A partir das 20:30 horas, no local social da Veiga proxectaranse oito curtas relacionadas coa parroquia, cunha duración aproximada de 60 minutos.

Na sesión proxectaranse varias curtametraxes realizadas en distintas edicións do Chanfaina Lab, todas elas gravadas en Naraío ou relacionadas coa súa veciñanza. Será unha oportunidade para volver descubrir, a través da mirada das cámaras, historias, lugares e persoas vinculadas á Naraío, recuperando historia e maneiras de contar que forman parte do patrimonio audiovisual construído no devalar do tempo polo encontro de cineastas. Ao remate da proxección haberá unha merenda comunitaria para as persoas asistentes por cortesía da Asociación Veciñal “O Castelo de Narahío”, creando un espazo para partillar impresións e conversar arredor do cinema propio nun ambiente próximo e distendido.

A asociación veciñal “O Castelo de Narahío” anima a toda a veciñanza a participar nesta tarde de encontro e memoria compartida.

O Chanfaina Itinerante é un ciclo de proxeccións organizado xunto ás asociacións veciñais das parroquias de San Sadurniño. Ao longo do verán, a iniciativa percorreu diferentes lugares do municipio levando de volta as historias filmadas no territorio e transformando os locais sociais en espazos de reunión arredor do audiovisual e da memoria colectiva.