Antonio Fraga

Técnico en Mantemento Industrial de profesión. A súa relación co audiovisual comezou de forma orgánica, capturando a adrenalina das súas rutas en moto de monte e o snowboard,  a través de cámaras deportivas. En 2019 deu un salto clave xunto ao seu grupo de amigos no colectivo NaraíoMedia, adentrándose na ficción e no formato curtametraxe no VI Chanfaina Lab. Desde aquel debut, o grupo non deixou de escribir guións e rodar, sumando xa cinco pezas nunha traxectoria, onde cada ano reflicte un evidente salto na aprendizaxe. Sumado ao seu traballo en NaraioMedia, Antonio tamén forma parte activa da asociación Solposto Producións, coa que alcanzou un importante recoñecemento ao gañar un premio na primeira edición do Festival de Cinema de Cabanas. Nesta nova edición do Chanfaina Lab, Antonio dá un paso máis alá na súa implicación co cinema local: ademais da súa faceta creativa, intégrase na organización do festival formando parte do seu imprescindible equipo de cociña.