Chanfaina itinerante: O cinema social

O ciclo «O Sansa social» propón unha viaxe polas relacións humanas, a memoria colectiva e as diferentes formas de convivencia a través dunha selección de curtametraxes realizadas ao longo das dez primeiras edicións do Chanfaina Lab. As pezas, escollidas polo artista visual Fran da Lobeira, ofrecen distintas miradas sobre a realidade social de San Sadurniño, abordando cuestións como a inmigración, a igualdade de xénero, o traballo, a educación, o envellecemento, os coidados e a organización comunitaria. Historias persoais que, no seu conxunto, permiten construír un retrato da sociedade e das súas transformacións.

A selección combina o traballo de cineastas de recoñecida traxectoria con creadoras locais, reflectindo un dos principios fundamentais do Chanfaina Lab: o encontro entre diferentes xeracións, experiencias e maneiras de entender o audiovisual. Máis alá dos conflitos e das problemáticas sociais, o ciclo tamén pon en valor os vínculos afectivos, a solidariedade e a memoria compartida como elementos esenciais para construír comunidade.

“Promo Chanfaina Lab” (César Galdo, 2014). Breve introdución ao espírito do Chanfaina Lab, un proxecto que promove a creación audiovisual colectiva e o encontro entre cineastas e veciñanza.

“Café-bar Santos peluquería” (Sonia Méndez, 2014). Retrato dun espazo singular de convivencia onde conflúen distintas xeracións. Un lugar cotián que se converte en punto de encontro e expresión da identidade comunitaria.

“O salón do canteiro” (Antón Caeiro, 2015).  Recupera a memoria dun antigo salón de baile como espazo de socialización durante o franquismo, evocando o papel do lecer e dos lugares de encontro nas relacións sociais..

“Mbemba en Sansa”  (Luís Avilés, 2019).  A chegada dun mozo senegalés a San Sadurniño permite reflexionar sobre a inmigración, os prexuízos, a integración e a convivencia intercultural, reivindicando unha sociedade aberta e acolledora.

“Trazos” (Alberte Branco, 2015).  A través dos retratos de oito veciños e veciñas de San Sadurniño, a peza explora a relación entre as persoas, o territorio e a identidade colectiva. Unha mirada á diversidade humana que conforma a comunidade e á importancia de cada historia individual na construción da memoria social.

“A través do tempo” (Noemí Caneiro, 2019). Unha mirada á educación e á infancia doutras épocas a través da memoria familiar. Destaca a importancia da transmisión interxeracional para comprender os cambios sociais e preservar a historia colectiva.

“Dereito a sermos vellas” (Irene Beceiro, 2018). Un percorrido polas diferentes etapas da vida das mulleres que convida a reflexionar sobre os roles de xénero, o envellecemento e o dereito a vivir con liberdade, cuestionando os condicionantes impostos pola sociedade.

“Historia do Cisne, o atún e a troita” (Teño unha horta, 2017). Recupera a memoria das traballadoras dunha antiga conserveira, poñendo en valor o papel das mulleres no desenvolvemento económico e social, as condicións laborais e a importancia de preservar a memoria do traballo.

“Coop” (Isabel Rey, 2024).  Un achegamento ao cooperativismo como modelo de organización económica e social baseado na colaboración, na solidariedade e na defensa dos recursos e servizos de proximidade.

“O Ikigai en Sansa” (Manolo Gómez, 2023). Reflexiona sobre o envellecemento activo, a participación social e a procura dun propósito vital despois da xubilación, reivindicando o papel das persoas maiores na comunidade.

“Cóntame a túa historia”  (Carlos Amil, 2024). Unha historia sobre a perda da memoria e os vínculos familiares que pon o foco nos coidados, no afecto e na importancia das relacións entre xeracións. Un peche íntimo que devolve o protagonismo ás persoa;

A duración do programa é de 91 minutos. A proxección e posterior debate será o día 14 de novembro na Escola Laica de Cabanas na Avda. da Torre, 40.